330 جار خوێندراوەتەوە 19/11/2018

هۆگر شاڵی بریکاری وەزارەتی کارەبا بۆ ( کوردستانی نوێ) : لەئاداری ساڵی داهاتوو 300 مێگاوات کارەبا لە وێستگەی هەڵمی خەبات بەرهەم دەهێنرێت

هۆگر شاڵی بریکاری وەزارەتی کارەبا بۆ ( کوردستانی نوێ) :
لەئاداری ساڵی داهاتوو 300 مێگاوات کارەبا لە وێستگەی هەڵمی خەبات بەرهەم دەهێنرێت
هۆگر شاڵی بریکاری وەزارەتی کارەبا لەدیمانەیەکیدا لەکوردستانی نوێ کە لەژمارە 7718ی رۆژی یەکشەممە بڵاوبووە تیشکی خستە سەر هەوڵەکانی وەزارەتی کارەبا بۆ زیادکردنی بڕی پێدانی کارەبای نیشتمانی بەهاوڵاتیان ، هاوکات باسی ئەو پرۆژەو کارانەی کرد کە پێویستە لەکابینەی نوێی حکومەتی هەرێمی کوردستاندا وەزارەتی کارەبا جێبەجێیان بکات؛ لەمبارەیەوە بریکاری وەزارەتی کارەبا راگەیاند: ( وەزارەتی سامانە سروشتیەکان بە وەزارەتی کارەبای راگەیاندبوو کە لەچەند مانگی داهاتوودا بەچەند قۆناغێک بەرهەمهێنانی غازی سروشتی لە کێڵگەکانی ( کۆرمۆر و خۆرمەڵە ) روو لەزیاد بوون دەکات، بەمەش بڕی 250- 300 مێگاوات کارەبا زیاد دەبێت، ئەمە وێڕای ئەوەی لە بەرنامەدایە لە ئاداری ساڵی داهاتوو بڕی 300 مێگاوات کارەبای تر لەوێستگەی هەڵمی خەبات زیاد بکرێت..) بریکاری وەزارەتی کارەبا سەبارەت بە تەرشیقکردن و دەنگۆی ئەگەری تێکەڵکردنی هەردوو وەزارەتی کارەبا و سامانە سروشتیەکان وتی : (کەمبوونەوەی ژمارەی وەزارەتەکانی حکومەتی هەرێمی کوردستان بەتایبەتی تێکەڵکردنی هەردوو وەزارەتی کارەبا و سامانە سروشتیەکان بەرنامەو دیراسەی بۆ کراوە بەتایبەتی کە کارو چالاکییەکانی وەزارەتی کارەبا بەشێکی گرنگە لە چالاکییەکانی وەزارەتی سامانە سروشتیەکان ، بەڵام ئەم بەرنامەو کارە بڕیارو یاسای ووردی دەوێت و لەکۆتایشدا وەزارەتی کارەبا پابەندی هەر بڕیارێکن کە لەحکومەتی هەرێمی کوردستان دەردەچێت..) لەوەڵامی پرسیارێکی رۆژنامەی کوردستانی نوێ دا کە سەبارەت بە ئەو بەرنامەو کارانەی کە پێویستە حکومەتی داهاتووی هەرێم لەبواری کارەبادا جێبەجێیان بکات بریکاری وەزارەتی کارەبا وتی : ( سروشتی پرۆژەو کارەکانی وەزارەتی کارەبا وایە کە بەردەوام پێویستی بەفراوانبوون و پرۆژەی نوێ و گەورەتر هەیە، بەتایبەتی کە بەهۆی قەیرانی دارایی لەچەند ساڵی رابردوو نەتوانرا زۆر لەو پرۆژەو پلانانە جێبەجێ بکرێت کە بۆ پەرەپێدانی بەردەوام پێویستمانە بۆیە هیوادارم لەحکومەتی داهاتوودا بتوانین بە پاڵپشتی و هاوکاری ئەنجومەنی وەزیران بودجەو پارە بۆ ئەو پرۆژە خزمەتگوزارییانەی کارەبا تەرخان بکرێت کە لەگەڵ فراوانبوونی شارو پێداویستیەکانی هاوڵاتیاندا پێویستن..)
• بۆ زیاتر زانیاری دەتوانن لەرێگەی ئەم لینکەی خوارەوە دەقی دیمانەکەی هۆگر شاڵی بریکاری وەزارەتی کارەبا بخوێننەوە :
http://knwe.org/?p=30861


Copyright © 2012 www.krgelectric.org Developed by Avesta Group and powered by Microsoft Azure